رسالة هامة من وزير المالية للمواطنين: معاكم حق بس مقدرش أقولك البنزين بـ 20 جنيها

قال الدكتور محمد معيط وزير المالية، إن المشاركة المجتمعية من الممكن أن يكون لها مساهمة كبيرة، في توجيه قرارات الحكومة. 

وأضاف معيط في تصريحات تلفزيونية على قناة صدى البلد: "من الحاجات التي نستوردها وليها تأثير سلبي علينا هي غاز البوتوجاز وهو يختلف عن الغاز الطبيعي ودا كان بيكلفنا عملة صعبة وفي نفس الوقت بيرهق المواطنين كأنبوبة ليها تكلفة وعبء الحصول عليها ولما ربنا كرمنا وبقى عندنا غاز طبيعي بقى التحدي الكبير هو أن نتحرك في اتجاه إنه كنا بنحط مثلا مليار وربع لتوصيل الغاز الطبيعي للمنازل وبعد تشاورات السيد الرئيس وجه إننا عاوزين نسرع من توصل الغاز للمنازل نقوم نحل مشكلة أنبوبة البوتوجاز". 

3.5 مليار جنيه لتوصيل الغاز للمنازل

وتابع الوزير:  "دا كمثال أثر في إن بدل واحد وربع مليار وصلت لـ 3.5 مليار جنيه علشان أوصل غاز طبيعي للمنازل أكتر".

ووجه وزوير المالية رسالة هامة للمواطن قائلاً: "المواطن بيقول الأرقام بالنسبالي ملهاش أي معنى معناها الحقيقي أشوف حياتي هشوفه في فرصة عمل في توافر السلع والخدمات وفي متناول الإيد وألاقي خدمات المجتمع عمالة بتزيد". 

الوزير للمواطنين: معاكم حق 

وأكمل الوزير: "هرجع تاني وهقول للمواطن أنت معاك حق إن أنت عاوز تشوف الأرقام تترجم في حياتك، فعلا أنت خلال الفترة اللي فاتت كنت متعود تفتح الجرنال أو تشوف الحديث المتواصل عن المناطق العشوائية أنت معدتش بتلاقي الكلام دا، أنت كنت بتلاقي أنبوبة البوتاجاز والطوابير ومعدتش بتشوف الكلام دا، كان عندك مشكلة قطع الكهرباء، ونقص في رغيف العيش والمواد البترولية معدتش بتشوف الكلام دا". 

موجة تضخمية ومرتبات ومعاشات دون مستوى الزيادة

وتابع الوزير: "عندي موجة تضخمية وعندي مرتبات ومعاشات مش بمستوى زيادة الأسعار فعلا فيه زيادات ضخمة جدا جدا ولكن علشان نكون صرحة العالم كله متأثر سلبيا بسبب الأوضاع دي واحنا كمان متأثرين، أنا عندي تضخم وزيادة سكانية فمش ملاحق لأن أنا بستورد".

وأضاف: "أنا كنت بستورد برميل البترول كان بيكلفني 60 دولار انهاردة أصبح بـ 110 دولارات الفرق دا محتاج أدبره ومش معقول هاجي أقولك لتر البنزين بـ 9 هخليه 20 أصل كنت بجيب البرميل بـ 60 أصبح بـ 110، مقدرش أعمل معاك كدا".

وأضاف: "مقدرش أقولك إن أنا كنت بجيب طن القمح بـ 250 دلوقتي بجيبه بـ 500 غير أسعار الشحن اللي ضربت بـ 3 دي فترة على العالم كله كل دا ضغط على اقتصاد الدولة، إحنا كنا بننزل الأسواق الدولة كنا بنقترض في حدود تكلفة مرة 3.5 مرة 3.8 أقصاها 5% انهاردة ولا 11% نتيجة للأوضاع العالمة". 

واختتم الوزير : "أنا مستوعب المواطن بيقول إيه كل ما نتمناه إن الدنيا ترجع تهدى تاني كنا وصلنا لتضخم تحت الـ 5% كان المواطن حاسس استقرار في الاسعار وزودنا المعاشات والمرتبات 12 % تقريبا فالدنيا بدأت تمشي  ".