السيسي: تكلفة مشروعات "حياة كريمة" قد تصل إلى تريليون جنيه

أشار الرئيس عبد الفتاح السيسي، رئيس الجمهورية، اليوم السبت، على المبادرة الرئاسية "حياة كريمة".

وقال الرئيس السيسي، خلال كلمته في افتتاح مشروع مستقبل مصر للإنتاج الزراعي: "هو أنا النهارده في الريف، مش بظبط الكهرباء والمياه والطرق وعناصر أخرى في حياة كريمة، والتكلفة داخله في 800 و900 مليار جنيه، وقد تصل إلى تريليون جنيه ولا حاجة".

وأضاف السيسي أنه "بنتكلم عن التطوير والإنفاق على 10 ملايين فدان، يتم الإنفاق علشان تظبط جودة حياة الناس للريف فيما يخص كل الأعمار والسنين اللي فاتت، تكلفة حياة كريمة قد تصل إلى ألف مليون جنيه، ألف مليون جنيه في 3 – 4 سنين، ازرع واعمل هنا كل شيء الكهرباء والطريق وتسوية الأرض والترع اللي اتعمل في 400 و500 سنة".

وتابع الرئيس: "زراعة الأراضي دي في الدلتا القديمة تم على سنين طويلة جدا، أنت جاي عاوز تعمله في 4 و5 سنين، دي حكاية كبيرة أوي اللي بتتعمل يا مصريين، من فضلك مش تحط رجل على رجل وتتكلم في موضوعات، الموضوعات دي كلها دراسات واتجمعت في سياق فكري وعلمي وتخطيطي علشان يتم طرحها، مش تاخد حتة وتسيب الباقي".

وقال الرئيس السيسي، خلال افتتاح مشروع مستقبل مصر الزراعي: "ليه دخلنا في عمق الصحراء رغم أن الشريط الملاصق للنيل يبتزرع بانحدار طبيعي للمياه يعني مش محتاجين حاجة ومفيش مشكلة، لكن لما تيجوا تبصوا من فوق على الشريط الموازي للنيل خلال السنين اللي فاتت بنينا عليه، وسيبنا الظهير الصحراوي اللي ممكن نبني فيه حياتنا ونسيب الأراضي الزراعية".

وعن وضع الأراضى المخصصة لبعض المستثمرين، قال الرئيس السيسي: "شوفت أن فيه أراضي في نطاق الأراضي دي مش تبع مستقبل مصر، ولقيت الأرض دي مش واضح أنه بيتعمل فيها شغل طيب انتوا خصصتوا الأراضي دي للمستثمرين، ولسه متزرعتش طيب ما نراجع مع الناس اللي موجودة هناك، وتطلع لجنة لو فيه مشكلة ما نساعد في حلها نشجعهم علشان تتزرع الأراضي دي".

ويفتتح الرئيس عبد الفتاح السيسي، صباح اليوم السبت، مشروع مستقبل مصر للإنتاج الزراعي، وفق ما صرح به السفير بسام راضي، المتحدث باسم رئاسة الجمهورية.