السيسي: كل إجراء لم نتخذه من 40 و 50 سنة ندفع ثمنه اليوم

أكد الرئيس عبدالفتاح السيسي، رئيس الجمهورية، اليوم السبت، أن كل إجراء لم نتخذه من 40 و 50 سنة ندفع ثمنه اليوم.

وقال الرئيس السيسي، خلال افتتاح مشروع مستقبل مصر الزراعي: "ليه دخلنا في عمق الصحراء رغم أن الشريط الملاصق للنيل يبتزرع بانحدار طبيعي للمياه يعني مش محتاجين حاجة ومفيش مشكلة، لكن لما تيجوا تبصوا من فوق على الشريط الموازي للنيل خلال السنين اللي فاتت بنينا عليه، وسيبنا الظهير الصحراوي اللي ممكن نبني فيه حياتنا ونسيب الأراضي الزراعية".

وأضاف السيسي أن "في نقاش وحوار في البلد وفي حراك كبير جداً واحنا سعداء بيه، لكن بقول لكل اللي بيسمعني من فضلكم الدولة كلامها حاجة تانية وإجرائها، عاوز حاجات كتير من الدراسات هتدي 100 سنة ولا لا؟ ولا الموضوع في وقته، ممكن حد يقول بتتكلفه التكاليف دي ليه؟، البدايل إيه لو معملناش كده يبقا إيه؟، إذا كنا خلال العشر سنوات اللي فاتت زدنا 20 مليون نسمة، طلبات العشرين مليون من السلع الأساسية، طيب إحنا انتجنا يقدر يكافئ ده؟، معندناش خيار تاني حتى تقولي نستورد من بره، طيب الأزمة الموجودة دلوقتي كاشفة للموضع ده، مش هنقدر نستنى المدة دي، تحرمني من 400 ألف فدان لو عملتهم قمح مش أقل من مليون طن، والقضية مش بقت بكام لكن هما متاحين في السوق العالمى ولا لأ؟.

وعن وضع الأراضى المخصصة لبعض المستثمرين، قال الرئيس السيسي: "شوفت أن فيه أراضي في نطاق الأراضي دي مش تبع مستقبل مصر، ولقيت الأرض دي مش واضح أنه بيتعمل فيها شغل طيب انتوا خصصتوا الأراضي دي للمستثمرين، ولسه متزرعتش طيب ما نراجع مع الناس اللي موجودة هناك، وتطلع لجنة لو فيه مشكلة ما نساعد في حلها نشجعهم علشان تتزرع الأراضي دي".

وتحدث الرئيس عن تطوير قطاع الكهرباء على مدار السنوات الماضية وكيف ساهمت في تطوير العديد من المشروعات مثل مشروع مستقبل مصر.

وقال الرئيس السيسي خلال كلمته في افتتاح مشروع مستقبل مصر للإنتاج الزراعى: "قطاع الكهرباء كان يحتاج إلى التطوير، المستشفيات مش فيها كهرباء، والبيوت اللي الكهرباء بتقطع فيها مرة واتنين وتلاتة تعمل إيه، مش رفاهية دي عناصر مهمة، وبناء مشروع مستقبل مصر زي ده أو مشروع توشكى، وتقولي أولويات الكهرباء لمرحلة متأخرة مثلا".

وأضاف السيسي أن "طريق الضبعة بيترفع الكفاءة ويتوسع، علشان الحجم هنا، حد يقولى كان ممكن يقول بلاش ده؟".

ويفتتح الرئيس عبد الفتاح السيسي، صباح اليوم السبت، مشروع مستقبل مصر للإنتاج الزراعي، وفق ما صرح به السفير بسام راضي، المتحدث باسم رئاسة الجمهورية.