محمد سامي يكشف أسباب اعتزاله: «زهقت من الدوامة وقررت أركّز في السينما»

قال المخرج محمد سامي إنه قرر الاعتزال في نهاية شهر رمضان الماضي بسبب رغبته في التفرغ للسينما، مشيرًا إلى أنه شعر بالملل من "الدوامة" التي يعيشها كل عام مع موسم الدراما الرمضانية.

وكشف سامي، خلال لقائه ببرنامج الصورة الذي تقدمه الإعلامية لميس الحديدي على شاشة النهار، تفاصيل قراره قائلًا: "لما عملت مسلسل نعمة الأفوكاتو ونجح، قررت أعمل بعده مسلسل إش إش لمي عمر، استكمالًا للنجاحات اللي حققناها في الموسم السابق، وكنت وقتها موقّع بالفعل على مسلسل سيد الناس".

وأضاف: "لو كنت بفكر بقلبي ومشاعري، كنت عملت إش إش واعتذرت عن سيد الناس. أنا مش بكذب ولا بتهرب، لكن مستحيل أعتذر عن مسلسل لمي علشان أي عمل تاني، حتى لو كان بطله نجم كبير".

فقاطعته الحديدي قائلة: "ده علشان خاطر مي؟"، ليرد سامي: "طبعًا، قولا واحدًا. لو مصلحتها هتتعارض مع أي حد، فمصلحتها في المقام الأول".

فسألته الحديدي: "علشان هي مراتك وبتحبها، ولا علشان ممثلة كويسة؟"، فأجاب: "الاثنين معًا".

ولفت سامي إلى أن تقديمه لعملين في موسم واحد كان من أكبر أخطائه، قائلًا: "أكبر غلطة عملتها في حقي إني قدمت سيد الناس وإش إش في نفس الوقت. تركيزي قل وتفكيري كان مشتت".

لتعقّب الحديدي: "لكن العملين نجحوا"، فرد سامي: "صحيح، الاتنين نجحوا، وإش إش أكتر، لكن لو كنت ركزت في سيد الناس لوحده، كنت هطلّع منه عشرة أضعاف اللي طلع، لأني بذلت فيه مجهود كبير، لكن تزامنه مع إش إش ظلمه شوية".

وردًا على سؤال الحديدي: "هل اعتزلت بسبب النقد والألفاظ اللي اتقال إنها مش مناسبة لبيوت الناس؟"، قال سامي: "سيد الناس مافيهوش ألفاظ خارجة، وبصراحة موضوع الألفاظ نسبي، وفيه أعمال اتقال فيها أكتر من كده بكتير".

واختتم حديثه قائلًا: "أنا اعتزلت لأني زهقت من الدوامة اللي مش بتخلص. كل سنة كنت بقول لنفسي هوقف مسلسلات وأركّز في السينما، خصوصًا إني مش عليّ أقساط، وعجباني طريقة مروان حامد وطارق العريان في اختيار أعمالهم وتأنّيهم."