نجيب ساويرس يحسم الجدل بشأن ترشحه لرئاسة الأهلي

نفى رجل الأعمال نجيب ساويرس بشكل قاطع نيته الترشح لرئاسة النادي الأهلي، مؤكدًا أن هذا الأمر لم يخطر بباله في أي وقت، نظرًا لانشغاله الشديد بأعماله، مشددًا على أهمية أن يكون من يتولى هذا المنصب متفرغًا تمامًا لخدمة النادي.

وقال ساويرس في مداخلة مع الإعلامي سيد علي ببرنامج "حضرة المواطن" على قناة الحدث اليوم: "أنا ما قلتش عايز أرشح نفسي لرئاسة الأهلي، ولا في مرة قلت نشوف أو ممكن، لا لا لا... أنا أهلاوي وأسعد بمساعدة أي شخص يتولى إدارة النادي الأهلي، لكن لا أقدر على إدارته بنفسي، لأن ده منصب يتطلب تفرغًا تامًا، وأنا مشغول جدًا في شغلي لدرجة ما عنديش وقت أفضي نفسي لحاجة زي كده. فلا أصلح على الإطلاق نتيجة انشغالي".

وأشاد ساويرس بالمنطق القائم على تحمّل المسؤولية بجدية، مضيفًا: "اللي ياخد مسؤولية لازم يكون قادر يديها حقها، واللي عارف إنه مش هيقدر يبقى غلط ياخدها، ويا ريت كل واحد شايف إنه مشغول يعمل كده".

من المرشح المناسب؟ الخطيب رمز و"البدائل موجودة"

وعن رؤيته لمن يمكن أن يخلف الكابتن محمود الخطيب في رئاسة النادي الأهلي، قال ساويرس: "المجلس فيه كفاءات كتيرة جدًا. ممكن محمود (في إشارة إلى محمود طاهر) يرجع تاني، وممكن حد تاني يجي، لكن الخطيب طبعًا أدى دور عظيم، وشخصية عظيمة، ويمس قلوب كل الأهلاوية، رحيله هيكون لحظة حزن لأن اللي ييجي مكانه مش مسألة سهلة".

وأضاف: "فيه كفاءات موجودة في مجلس الإدارة، ومحمود طاهر كمدير سابق للنادي، بس لو يرضى يرجع، ومعرفش... النادي الأهلي نادي عريق، وعنده كفاءات كتير".

ساويرس: أي رجل أعمال أهلاوي ممكن يترشح... لكن لازم يكون متفرغ

وعن احتمالية دعم أحد رجال الأعمال لرئاسة الأهلي، قال ساويرس: "أنا أرشح أي واحد أهلاوي، أيوه، بس لازم يكون أهلاوي فعلًا، ويكون فاضي. راجل الأعمال اللي مشغول جدًا ما ينفعش، لازم يبقى فاضي علشان يقدر يخدم النادي".

وعن ذكر اسم رجل الأعمال ياسين منصور ضمن الأسماء المطروحة، لم يؤكد ساويرس أو ينفي، مكتفيًا بالتأكيد على أهمية التفرغ والانتماء الحقيقي للنادي.

مشروع ترفيهي في سوهاج: "مش مصيف... لكن مكان للعائلات"

وفي سؤال حول مشروع محتمل لإنشاء مصيف في سوهاج، أوضح ساويرس الفكرة قائلًا: "أنا فكرت أعمل حاجة في سوهاج، لما زرت المحافظ، قال لي في جزيرة وسط النيل. الفكرة مش مصيف، لكن مكان زي نادي على النيل، لأن الأقاليم ما عندهاش متنفس، النوادي قلت، والمساحات الخضرا كمان. فالفكرة إن العائلات تقدر تروح هناك يوم الجمعة أو السبت، كنوع من الترفيه. ده التفكير يعني."

نجاح الجونة... ونقل أنشطة من الساحل؟

وخلال اللقاء، أشار المحاور إلى نجاح مشروع الجونة الذي أنشأته عائلة ساويرس، واصفًا إياه بأنه "أنجح مشروع في مصر" وله "سمعة عالمية"، وأوضح أنه زار دولًا عديدة تحدث فيها الناس عن الجونة بإعجاب.