أعربت الفنانة أنغام عن استيائها البالغ من الأوضاع التي تمر بها، خاصة بعد الزج باسمها في أزمة الفنانة شيرين عبدالوهاب بعد حفلها في مهرجان موازين، موضحة أنها لا علاقة لها بما حدث في الحفل، وأنها لا تتحمل المسؤولية عما حدث.
وقالت أنغام، خلال مداخلة هاتفية مع الإعلامية لميس الحديدي في برنامج "كلمة أخيرة" على قناة ON، أنها كانت في المستشفى منذ السبت الماضي بسبب وعكة صحية مفاجئة، موضحة: "أنا فعلًا في المستشفى بعد وعكة صحية حدثت بشكل مفاجئ يوم الأربعاء الماضي. شعرت بتعب شديد وتم نقلي للمستشفى صباح السبت. لم أكن أريد أن يعرف أحد، لأنني كنت تعبانة جدًا ولم أستطع استقبال زيارات أو شرح حالتي الصحية".
وأضافت أنغام: "كنت فاكرة أنني سأدخل المستشفى ليوم واحد فقط لأخذ مسكنات وإجراء فحوصات، لكن الأمر تطلب فترة أطول، والحمد لله الموضوع بسيط، لكنه يحتاج صبرًا واستشارات".
وبخصوص الحملة التي استهدفتها، أكدت أنغام أنها لا تحب الدفاع عن نفسها أو الدخول في مهاترات، مشيرة إلى أنها لا ترد على الشائعات عمومًا: "أنا مش من الشخصيات اللي بتحب تدافع عن نفسها، ولا بدخل في مهاترات. ده منهجي في حياتي الشخصية والمهنية من زمان، فأنا بسيب الأمور تختفي لوحدها، وربنا بينصفني دايمًا".
وتابعت أنغام، باكية: "الظلم المرة دي غير محتمل. أنا لا قادرة أتكلم ولا قادرة أسكت، لكن الأمر وصل لدرجة التجريح والشتائم والتلميحات اللي مش مقبولة من ناس المفروض يكونوا مسؤولين وزملاء. البعض بيقول إحنا عارفين مين ورا الحملة، والفانز بتاع المطربة المنافسة بيقولوا كأنهم عارفين حاجة، وفي مواقع كتبت اسمي بشكل مباشر".
وأضافت: "ليه الشتيمة والتجريح وأنا في المستشفى؟! محدش كان يعرف غير أقرب الناس ليّ. وأنا على سرير المستشفى لقيت ناس بتبعتلي وبتشتمني. أنا مالي؟! هو أنا ليه علاقة بالمشكلة اللي حصلت في الحفلة؟! ضمائركم راحت فين؟!".
وأوضحت أن أنغام قد تحملت العديد من التلميحات ضدها، بل وحتى من شيرين نفسها، لكن لم ترد: "أنا تحملت أربع سنين من التلميحات، ومع ذلك ماردتش ولا مرة. كنت بزعل بيني وبين نفسي، لكن اليوم الأمر وصل لمرحلة توجيه الناس ضدي؟! تطلعوني كأني بتآمر وأقود حملات ضد زميلة؟! ده ظلم وحرام وعيب".
وأكدت أنغام أنها لا تتهم شيرين شخصيًا، لكنها تتحدث عن الأشخاص الذين يحيطون بها والذين يحاولون استخدام اسمها لتوجيه الحملة ضدها، وقالت: "أنا مش هقول إني أكبر من كده وهي كمان أكبر من كده، لكن عيب اللي بيحصل. واللي بيحاولوا يقربوا منها بطريقة مغلوطة ويقولوا لها يحبوا يشجعوها براحتهم، لكن مالهمش دعوة بيا".
وتوجهت أنغام برسالة تحذيرية قائلة: "أي شخص هيتمادى وهيجيب سيريتي، مش هسكت. أنا فعلاً تعبت، ورفعت قضية قبل كده ضد شاب كتب عني على تويتر وقال 'مش هترحمي شيرين يا أنغام' وكسبت القضية اتحبس. وأي حد هيتجرأ تاني ويزج بإسمي مش هسكت".
وأوضحت أنغام أنها تعبت من الظلم والكره قائلة: "كفاية ظلم، كفاية كره، كفاية حقد. أنا تعبت. سبوني في حالي. محدش ليه دعوة بنيتي، ربنا اللي هيحاسبني".
واختتمت أنغام حديثها برسالة لجمهورها قائلة: "أنا عايزة من الناس اللي بتحبني مايحطونيش في مقارنة مع حد. حبوني علشاني أنا، مش علشان أكون أحسن من حد. ماتقارنونيش بحد، ولا تقارنوا حد بيا حتى لو المقارنة في صالحي. ده شيء مش مقبول ومش بيكبرني. لو بتحبوني بجد، مش ده الأسلوب اللي تقدروا تكرموني بيه أو تدعموني بيه. لو سمحتوا، ماتحطونيش في مواقف تخلي الناس تعتقد إني زقتكم تعملوا ده".
تابعوا آخر أخبار العقارية على Google News
تابعوا آخر أخبار العقارية على نبض
