الوقت انتهى.. رسالة أديب لـ رئيس الوزراء وكامل الوزير بشأن عزاء أسر ضحايا الإقليمي

اقترح الإعلامي عمرو أديب تشكيل لجنة تحقيق بعد حادث الطريق الإقليمي بالمنوفية، حتى لا تتكرر الحوادث، متابعًا: "الرأي العام تحدث بصوت عالٍ خلال الفترة الماضية".

وأضاف أديب خلال برنامج "الحكاية" عبر فضائية MBC مصر، اليوم السبت: "كنت شايف إن مجلس النواب ممكن يعمل حاجة، دي مش حادثة عادية، إحنا عايزين نفهم الأشياء بتتم صح ولا لأ".

وتابع: "العيب إنك تعزّي الناس كده، أنا مش فاهم، وزير النقل بعت التعازي من خلال زميل في محطة تليفزيونية، هي الوزارة مش فيها ناس بتعرف تكتب؟ أنا عايز تعزية سطرين، الناس ساعات بتكون عدوة نفسها".

واستطرد: "رئيس الوزراء لم يعزّ حتى الآن، أنا مش ضده، هو راجل محترم وأصيل وطيب، لكن الخارجية الأردنية قدمت العزاء، وإنت لسه معزّتش! ده واجب عليك، أنا بحبك وأعرفك من زمان، بس لو عزّيت كمان 10 دقايق مالهاش لازمة، يا راجل، طبطب على الناس، إنت رئيس وزراء مصر، ليه العند مع 100 مليون؟ طبطب عليهم".

وواصل موجّهًا حديثه للدكتور مصطفى مدبولي: "إنت قاعد على الكرسي اللي كان قاعد عليه مصطفى النحاس، العزاء ده واجب، أنا ما قلتش تروح القرية، لكن كنت قدمت العزاء، حتى وأنت بتفتتح مشروعات النهارده،  ده شعب غلبان ومسكين، ده مش مصطفى مدبولي اللي نعرفه، اللي شال معانا الهم السنين اللي فاتت".