عمرو أديب: لا أثق في "الورق".. والذهب للأولاد مش لليوم بيومه

كشف الإعلامي عمرو أديب، عن رؤيته للوضع الاقتصادي الحالي، مؤكدًا أنه لا يحبذ الاعتماد على "الورق"، في إشارة للأموال النقدية أو الأصول الورقية، مشيرًا إلى تفضيله الاستثمار في الذهب والعقارات.

وقال أديب خلال تقديم برنامج "الحكاية": "في الظروف اللي إحنا فيها دي، أنا ما بحبش الورق، شوية دهب أحسن، أنا مش بنصح حد، أنا بتكلم بشكل عام، عقار؟ تمام.. إنما الورق والحاجات دي؟ لأ، دي وجهة نظري الشخصية، وأنا مش عبقري يعني، ولا أستاذ اقتصاد، بس دي نظرتي".

وأعرب عن احترامه الكبير للذهب كمخزن للقيمة على المدى الطويل، قائلًا: "أنا بشوف الذهب زي الفل دايمًا صحابي يسألوني عليه، وبقولهم: الذهب ده مش بتاع يوم ويوم لأ.. ده استثمار للأولاد"

وأشار أديب إلى ارتفاع أسعار الذهب بشكل ملحوظ، مسترجعًا بدايات حديثه عن الذهب: "لما بدأنا البرنامج، كنا بنتكلم عن الأونصة بألف وخمسمية دولار، النهاردة؟ تلاتة تلاف وخمسمية، ده رقم تاريخي، عمر الذهب ما وصله قبل كده"

وعن توقعاته للسوق، أوضح: "الرقم ده هيهدى شوية في الأيام الجاية، وممكن نشوفه تحت التلات تلاف، بس يفضل رقم ضخم، ومش طبيعي".

ثم انتقل أديب للحديث عن الجانب العاطفي والثقافي في اقتناء الذهب، مستشهدًا بوالدته رحمها الله: "أمي كانت دايمًا تقولنا: الغويشة أمان، وكانت لما تحتاج فلوس، تفكهم، ولما الدنيا تفك، ترجع تجيب غيرهم، مش ماركات ولا حاجات غالية، بس كانت دهب صافي، قيمته محفوظة".