بعد زيادة أسعار تذاكر المترو.. النشطاء: هنتجنن المرتب بيخلص على المواصلات

تذاكر مترو الأنفاق| تصدر "مترو الأنفاق" تريند مصر عبر مواقع التواصل الاجتماعي، وعبر مؤشر البحث الأكثر شهرة "جوجل"، وذلك بعد إعلان الهيئة القومية للأنفاق، رفع أسعار تذاكر المترو، بداية من صباح اليوم 1 أغسطس 2024.

زيادة أسعار تذاكر مترو الأنفاق

أثار قرار زيادة أسعار تذاكر مترو الأنفاق، بقيمة تتراوح بين جنيهين إلى 5 جنيهات، ردود أفعال واسعة بين نشطاء مواقع التواصل الاجتماعي، فالبعض سخر مطالبًا بإلغاء يوم الخميس من كل أسبوع، مشيرين إلى أن قرارات زيادة الأسعار يتم اتخاذها في يوم الخميس، في حين عبر آخرون عن شكواهم من زيادة أسعار المواصلات، مؤكدين أن المواصلات أصبحت تلتهم المرتبات الضعيفة.

سخرت الناشطة هالة ثابت قائلة: "#مترو_الإنفاق ياريت يوم الخميس يتلغى من الأسبوع خالص الشعب المصري ده أكيد معموله حاجة على يوم الخميس".

سعر أول تذكرة لمترو الأنفاق 50 قرشًا

أما البلوجر عبير المصري فقالت: "أول ما افتتح #مترو_الانفاق كانت التذكره بـ ٥٠ قرشًا وزادت ٥٠ قرشًا فقط في أواخر عهد مبارك أصبحت بجنيه واحد فقط، المترو ملايين بتركبه يوميًا ومواصلة مهمة جدًا وللعلم الأسعار لما كانت بتزيد كانت كل كام سنة ربع جنيه أو نص جنيه"

ارتفاع سعر تذكرة المترو من 2 جنيه وحتى 5 جنيهات

أما الناشطة جهاد أحمد فقالت: "أحد المواطنين بيعيط فى محطة مترو الأنفاق بسبب تفاجئه من موظف شباك التذاكر، قاله أصل تذكرة المترو زادت حضرتك... من تسبب فى هذه الدموع البريئة.. رسميًا النهاردة زيادة تذاكر مترو الأنفاق 9 محطات بـ 8 جنيهات بدلا من 6 جنيهات، و16 محطة ب 10 جنيهات بدلا من 8 جنيهات، 23 محطة بـ 15 جنيها بدلا من 12 جنيها، أكثر من 23 محطة بـ 20 جنيها بدلا من 15 جنيها، مترو الأنفاق.. المترو بقي خلاص من حاجات النادرة".

الناس بتشتغل علشان تدفع ثمن المواصلات

وقال الناشط وائل شوقي: "دايما زيادة الأسعار تأتي فجأة وإحنا نائمين بدون تمهيد.. مترو الانفاق"

أما الناشط أحمد نادي فقال: "ثواني بس معلش هو التذكرة زيادة ليه علشان البنزين والسولار زاد طب ده قطار كهرباء مش بنزين أو سولار.. مترو الأنفاق"

وعبر البلوجر شريف علي حزنه فقال: "الناس بتشتغل علشان تدفع مواصلات الشغل مش تاكل وتشرب.. تذاكر المترو زادت؟"

وعلقت الناشطة آلاء محمد قائلة: "معقول فلوس الشغل كلها اخلصها على تذاكر المترو لأن سعر تذاكر زادت!"

وقالت الناشطة أمنية حسان: "الناس هتتجنن من أسعار تذاكر المترو قولتلكم نلغي يوم الخميس هو سبب خراب كل شيء"

المواصلات أصبحت تلتهم معظم المرتب

أما الناشطة هرمونيكا فقالت: " الناس في المستشفى إمبارح ماشية تكلم نفسها من الغلاء وضعف المرتب... يصبحوا النهاردة على زيادة تذاكر المترو.. لا حول ولا قوة إلا بالله"

وردت الناشطة مريم فقالت: "ياريت كنت خزنت تذاكر المترو"

أما داليا حلمي فقالت: " بعد ما تذاكر المترو أرتفع سعرها المترو بقى فاضي مش عارفه افرح ولا ازعل"

وقالت الناشطة مها: "النهارده أول أيام الشهر وبكرة إجازة والحكومة حبت تصبح علينا.. ارتفاع أسعار تذاكر المترو..."

وعلق الناشط أبو مريم فقال: "إحنا كنا بنشتكى إزاى السواقين جشعين ورفعوا الأجرة اثنين جنيه مرة واحدة، دون مراعاة أن المرتبات ثابتة، وأن هذا سيؤثر على ميزانية البيت، اللى أصلا مش نافعة، ومش بعيد ناس لن تستطيع أن تكمل فى شغلها، لأن المواصلات أصبحت تلتهم معظم المرتب، تقوم الحكومة تزود تذاكر المترو اتنين جنيه مرة واحدة".