الرئيس السيسي: بغض النظر عن النتيجة لازم نبقى حريصين على المنافسة الشريفة وأخلاق الرياضة المحترمة

استقبل الرئيس عبد الفتاح السيسي، رئيس الجمهورية، اللاعبين والمدربين الحاصلين على ميداليات ذهبية ببطولة الألعاب الأفريقية، تكريماً لهم.

ورحب الرئيس السيسي، باللاعبين والمدربين الحاصلين على ميداليات ذهبية ببطولة الألعاب الأفريقية، معربًا عن سعادته بلقائهم، قائلًا: "ألف مبروك وبهنيكم على اللي حققتوه".

وقال الرئيس: "أنتم فرحتوا كل الناس، وكل المصريين اللي شافوا النتايج اللي أنتم حققتوها، واللي ممكن كمان ربنا يوفقنا ونحققها في باريس بيكم برضو أن شاء الله وبزمايلكم اللي موجودين هنا أو اللي موجودين في المعسكرات الرياضية بره، ربنا يوفقهم".

ووجه السيسي، الشكر للأبطال باسمه وباسم كل المصريين، كما وجه الشكر لكل المشرفين والقائمين من أجهزة إدارية وفنية، مشيدًا بحجم الجهد الكبير المبذول.

وأكد الرئيس عبدالفتاح السيسي، على أن الرياضة تعكس مدى تحضر الدول والشعوب، وأنه كلما كان هناك نجاح وتفوق وميداليات أكثر، فإن النتيجة تعكس قدرة الدولة على المنافسة، وكلما حققت ميداليات أكثر كلما كانت قدرة الدولة عالية.

وأوضح رئيس الجمهورية، أن مصر لديها عدد سكان كبير، وبالتالي فإن الفرصة سانحة لدينا لكى يكون لدينا لاعبين متميزين دوليين، مضيفًا: "لأن عندنا حجم شباب كبير لو خد فرصته، والكلام ده لينا كلنا ولكل مهتم بالرياضة لو الشباب خد فرصته ويبقى عنده فرصة فى لعبة معينة مش شرط كرة القدم فقط لكن فى أي من الألعاب".

وأضاف السيسي: "مش عايز أطول عليكم، أنا سعيد إن انتوا موجودين معانا النهارده، وسعيد باللي حققتوه في أفريقيا، وهبقي سعيد أكتر أو هنبقي كلنا سعداء أكتر باللي ممكن ربنا سبحانه وتعالي، لأن طبعا المنافسة على مستوى العالم أكبر بكتير من أفريقيا، وطبعا دول متقدمة جدًا في مجال الرياضة بتبقي موجودة، وبالتالي لو النتائج كويسة دا معناه إن احنا ماشيين في الطريق السليم".

وشدد الرئيس السيسي، على أنه رغم حرصنا الحصول على ميداليات وبطولات وكلام من هذا القبيل، لكن دائمًا يبقى الأسلوب وتقديم أنفسنا بشكل يليق بمصر، مضيفًا: "يعني لو أنا النهارده لاعب أو لاعبة موجودة خارج الدولة أو حتى داخل الدولة وكنت حريص جدًا إن أنا في ممارساتي وسلوكياتي كلها تعكس حجم كبير من التحضر والقيم الرفيعة".

وتابع الرئيس: "صدقوني بغض النظر عن النتائج، يعني بغض النظر عن أننا نحصل على نتيجة كويسة، لكن ده جزء مهم جدا من فضلكم مهم أوي أن احنا كلنا نبقى حريصين عليه، اللي هو المنافسة الشريفة وأخلاق الرياضة المحترمة، خلوا بالكم من النقطة دي أوي، لأن ده بيبقى محل تقييم من الناس اللي بتشوفنا، وجزء كبير من الموضوع إن الناس تشوف الناس دي سلوكياتها إيه؟ وأخلاقياتها ايه؟، مش بس نتائج اللعبة".