الرئيس السيسي: «بقول للأشرار مفيش نجاح غير بسبيل المصلحين»

قال الرئيس عبدالفتاح السيسي، رئيس الجمهورية: «مفيش أمة في العالم تطلع لقدام أبدًا من غير ما تاخد بأسباب الدنيا لكن يحرسها مسار أخلاق عميق.. ولو تخلت عنه لا يمكن اللي بيتخذوا منهج الأشرار.. وبقول لأشرار لأني انأى بنفسي.. لا يمكن فيه أمة تطلع لقدام».

وأضاف الرئيس السيسي خلال احتفالية المولد النبوي الشريف: «بقول للأشرار اللي بيتصوروا أنهم ينجحوا أبدًا بغير سبيل المصلحين.. الهدم.. والخراب.. والظنون وإشاعة الألم والفرقة والانحطاط.. والكذب.. مفيش نجاح غير بسبيل المصلحين.. الهدم الظنون والشكوك وإشاعة الألم والفرقة والانهيار والكذب لا يمكن.. دي مش سنن ربنا.. والله هذا الأمر ليس من سنن الله عز وجل هذا الأمر ليس من سنن الله أبدًا».

وتابع: «المهم أقول ليكم وأنتم دعاه تتحدثوا للناس في المنابر.. بكرر الكلام ده ليكم.. المنهج اللي ماشيين بيه صدقوني منهح بيحاول يكون مستقيم وأمين ومخلص لله وشريف كمان في هذا المسار.. معنديش شك".

وسجل الرئيس عبدالفتاح السيسي، رئيس الجمهورية، إعجابه بشباب الخريجين، معلقًا: «كنا امبارح موجودين في الإسماعيلية وشوفنا تخريج شباب الجامعات».

وتابع الرئيس السيسي خلال كلمته بذكرى المولد النبوي الشريف: «والحقيقة الاحتفال ده رغم بساطته لكن الحشد اللي تم فيه.. استدعى حاجة غريبة.. بقى فيه أمة شبابها بالحجم ده ويبقا عندها قلق في بكره؟».

وأكمل: «فيه أمة يكون شبابها ما شاء الله بالعدد والحجم والقدرة دي تبقا قلقانة من بكره؟.. ده بكره ده بتاعهم هما.. وهما قادرين يحفظوا أقدار هذه الأمة».

وأكد السيسي، أنه رغم الظروف الصعبة التي نمر بها سيسدد الله خطانا، قائلًا: «مفيش شك رغم الظروف الصعبة دي إن الله سبحانه وتعالى هيسدد الخطى.. لازم يكون عندنا ثقة في الله والمسار رغم الظروف الصعبة».

وشارك الرئيس عبد الفتاح السيسي، في احتفالية وزارة الأوقاف بالمولد النبوي الشريف التي تنظمها وزارة الأوقاف.

وشارك في احتفالية المولد النبوي الشريف، الدكتور مصطفى مدبولي رئيس مجلس الوزراء، وفضيلة الإمام الأكبر الدكتور أحمد الطيب شيخ الأزهر الشريف، والدكتور محمد مختار جمعة وزير الأوقاف، والدكتور شوقي علام مفتي الجمهورية، وعدد من الوزراء والسفراء وكبار رجال الدولة.