"خلاص هانت وهتخلص".. بشرى سارة للمواطنين بشأن أزمة ارتفاع الأسعار الحالية (فيديو)

تحدث الإعلامي يوسف الحسيني، عن تحسن السلوك الشرائي للكثير من المواطنين بعد ارتفاع الأسعار خلال الفترة الماضية، نتيجة زيادة التضخم وتغير سعر الصرف.

أزمة ارتفاع الأسعار

قال الإعلامي يوسف الحسيني خلال تقديمه برنامجه "التاسعة"، إن ارتفاع الأسعار أكبر من تصورات الكثير من المصريين، موضحًا أن هذا وضع قائم ولابد من التعامل معه بحرص شديد.

سلوك الإنفاق والاستهلاك

أضاف: "هذا الوضع جعل المصريين يمشوا في اتجاهين كويسين.. أولهما هو اتجاه قدرنا نحسن من سلوكنا في الإنفاق والاستهلاك بشكل عام مش على الأكل والشرب فقط.. وبقينا بنشتري بطريقة سليمة.. يعني بقينا بنشتري على القد.. والحاجات اللي موجودة خلصت ننزل نشتري تاني".

وتابع: "بنلف وندور كتير على الأجهزة الكهربائية عشان نجيب أفضل سعر مع أفضل جودة.. وبنفاصل ونطلع عين الناس ودا عادي".

الظروف الاقتصادية

أوضح: "السلوك الاستهلاكي والإنفاقي للمصريين أصبح أفضل بسبب الأوضاع الحالية.. وعندما تنتهي هذه الأزمة.. وأكيد هتخلص هنرجع برضه زي الأول.. بس خليك محافظ على السلوك الإنفاقي والشرائي الجديد بتاعك.. متشتريش اللي ملوش لازمة.. وبسبب الظروف الاقتصادية بقينا بنتوجه أكتر للمنتج المصري ونطنش المستورد".

وأكمل: "أنا بشجع الصناعة الوطنية.. والناس بقيت تروح تشتري المنتجات المصرية عشان سعرها حنين وهادية على الجيب.. بس لازم صاحب المصنع يبقى حريص على مستويات ومعدلات الكفاءة ورفع جودة المنتجات طول الوقت سواء الأزمة استمرت أو لم تنتهي".