الرئيس السيسي: الأكل غالي صحيح بس إحنا بنبني الدولة وبنعالج تاريخ طويل

رد الرئيس عبد الفتاح السيسي، رئيس الجمهورية، على مهاجمي تنفيذ الدولة للمشروع القومي ترعة المحمودية بطول 20 كم.

وقال الرئيس عبد الفتاح السيسي، خلال انطلاق فعاليات المؤتمر الوطني بالإسكندرية: الأكل غالي صحيح، بس إحنا بنبني الدولة، وبنعالج تاريخ طويل، عايز أقولكم على حاجة.. مرضيتش أقول لـ دكتور مصطفى وقف محور المحمودية، ووري الناس كان شكله عامل ازاي، وهقول جملة صعبة، كانت الناس راضية وساكته، نخليه كدا وناكل ولا أشيله وأخليه زي ما بتشوفوه دلوقتي والدنيا تبقى صعبة شوية.

وأضاف الرئيس: أسيب الناس مرمية في الشوارع ونايمه في الصفيح والأكل موجود ناكل، ولا أسكنهم في بشاير الخير والدنيا تبقى غالية شوية، عملنا الـ 20 كيلو الأولانين من محور المحمودية، وكانت كل الناس بتشتكي على الجرائد وعلى مواقع التواصل، ويقولك بتهدوا الجوامع.. يا سيدي هنرجع الجوامع والكنائس تاني بس هترجع صح، وأنا بكلمكم كدا بقالنا سنتين ونصف شغالين في امتداد محور المحمودية 55 كم، لنصل حتى البحيرة.

وتابع رئيس الجمهورية: بيقولك البلد بتحب الطرق.. لا مش واخدين بالكم يعني إيه بلد ولا إيه؟، الدولة حاجة تانية خالص، التخطيط بيقوم بيه علماء ودكاترة جامعة ودكاترة بالوزارات المتخصصة، إذا استطاعت الدولة القيام بها يبقى خير.