الدكتور مجدي يعقوب: "هفضل اشتغل لحد لما أقع وأموت"

كشف الدكتور مجدي يعقوب، أن مركز أسوان لأمراض القلب يجري قرابة 1200 عملية قلب مفتوح سنوياً، وأن مركز أكتوبر متوقع خروجه للنور خلال شهر إبريل 2024، ويشمل 300 سرير.

قال البروفيسور مجدي يعقوب خلال لقائه ببرنامج "كلمة أخيرة"، مع الإعلامية لميس الحديدي: "هفضل أشتغل لحد لما أقع وأموت.. ولن أتوقف لأن الشغل بيعطيني سعادة غير طبيعية".

وأكد جراح القلب العالمي: "عمري ما قلت هعتزل في 2006.. وعمري ما اعتزلت عن الشغل مع زملائي.. وأنا دلوقت ببدأ يومي الصبح الساعة 3 الصبح بقراءة المجلات العلمية الجديدة.. عشان أشوف العلم وصل لفين لأن كل 5 دقائق فيه جديد".

وأشار البروفيسور مجدي يعقوب إلى أن: "النوم الطويل مش كويس للمخ والنخاع الشوكي.. والنوم المتواصل في الليل بيعمل مشكلة في حركة السوائل المرتبطة بين النخاع الشوكي والمخ.. وعشان كدا لازم نصحى في نص النوم نص ساعة ونرجع تاني علشان ننشط حركة السوائل".

وكشف يعقوب: "أجريت 4 الالاف عملية زراعة قلب.. وبحلم بدخول زراعة القلب في مصر.. لأن في مرضى كتير صغار وكبار السن في حاجة لده.. وزراعة القلب تقدمت للغاية".

وقال الكتور مجدي يعقوب: "العالم كله اتفق على إن الموت بيكون بموت جذع المخ.. ويجب على الإنسان أن ينفع الآخرين.. والشعب لازم يثق في الأطباء والحكومة في مسألة التبرع بالأعضاء.. ومصر لازم تساعد نفسها في مسألة زراعة الأعضاء لأنها هدية من الشعب للشعب".

وأكد: "التبرع بالأعضاء عند وفاة المخ موجودة في كل دول العالم باستثناء مصر.. وزراعة الأعضاء في مصر مش ماشية كويس.. والمصيبة فيه سماسرة كتير وهذه عدم أمانة".