ياسمين عز: الراجل غلبان ومفتاحه ودنه.. وخافي عليه لأنه حتة آثار

طالبت الإعلامية ياسمين عز، السيدات، بالتغاضي عن أخطاء أزواجهن، مع العمل على احتوائهم وعدم طلب الانفصال بشكل نهائي.

 مفتاح الرجل ودنه

وفي برنامجها كلام الناس، قالت ياسمين عز: مفاتيح الراجل تلاتة أمه وأخته وودنه وهعمل حلقة تانية عن أخته خصوصًا وهو عايز يسمع كلام طيب وحلو حتى لو غلطانة والزن على الودان أمر من السحر وهيشوفك ست الكل.

وتابعت: لو رجع والخطة نجحت وساب الزوجة التانية السؤال ليكي ماذا لو عاد معتذرًا؟ يا أهلا بيه والله يحيه هنرجع ونحافظ على بيتنا ومفيش كلمة طلاق.

الراجل غلبان

وواصلت ياسمين عز حديثها قائلة: الراجل غلبان وغلط ورجع لصوابه والعتاب بعدين، متبقاش هي قاعدة رجلها في الشمس وأنتي وشك يكون قد اللقمة وتتمنعي عن الرجوع.

واستشهدت ياسمين عز بـ مثل شعبي قديم، قائلة: حطي جوزك فوق السطوح ولو ليكي نصيب فيه مش هيروح، وحرصي من القريب قبل الغريب ومينفعش جوزك يوصل صاحبتك.

وأردفت: أي مكان فيه تجمع جوزك في إيدك لأنه فرعون وحتة آثار ولو رايحة الحمام خديه معاكي، ومتعزميش صاحبتك وتسبيها جنب جوزك وتروحي تجيبي العصير من المطبخ لأن بكرا هتروح هي تجيب الشربات ومينفعش تقولي الست مش ملزمة لأن هتيجي واحدة ملزمة تاخده منك وتفصص له السمك.