السيسي: دفعنا 700 مليون جنيه تعويضات اجتماعية بمحور المحمودية

قال الرئيس عبد الفتاح السيسي، إن الدولة دفعت 700 مليون جنيه تعويضات اجتماعية، لمخالفين أثناء تنفيذ محور المحمودية، مؤكدا أن الدولة رغم أنهم مخالفين لم تتركهم، مؤكدا أنه لن يتم السماح بأي تعديات أخرى.

وتابع الرئيس: "في محور المحمودية لو المحور دا مكنش عليه أكتر من ألف أو ألفين وحدة على أرض مخالفة أرض دولة ودفعنا 700 مليون جنيه تعويض اجتماعي، يعني رغم إنه مخالف ودي مش أرضه قولنا منقدرش نسيب الناس كدا ونمشيها فاللواء هشام كان محافظ ساعتها قال إحنا محتاجين 700 مليون جنيه علشان أخلي المحور دا وأعمل طريق ييوصل من إسكندرية حتى أبو حمص حوالي 70 كيلو تقريبا".

تأخر تنفيذ المشروعات بسبب المخالفات

وتابع: "توقفت هنا عاوز أقولكم لو مكناش الكلام دا موجود المخالفات دي كان زمان المحور دا اتعمل من سنتين فاتوا لكن لأن أنا بخش في إجراءات مع الناس وأدبرلهم الأموال المطلوبة بنزيل وبعدين نعمل المحور".

رسالة حازمة

 وتابع: "فيه مناطق مقدرناش نعمل فيها كدا علشان لما لقينا الكثافة السكانية عالية أوي اضطرينا إن احنا نعمل كوبري علشان نحافظ على الترعة ونحافظ على الناس بقول كدا ليكم علشان الناس تبقى منتبهة إن احنا مفروض منعملش كدا تاني وإن الدولة تسمح بكدا تاني مفيش محافظ يسمح بالتعدي على جسر ترعة أو على حرم طريق".

وتابع: "حتى الطريق الزراعي اللي بنتكم عليه اتعمل سنة 59 لو مكنش تم التعدي على حرم الطريق كان ممكن أوي نعمل الطريق دا 5 حارات بربع التكلفة لكن احنا اضطرينا نكمل الصحراوي بالطريقة دي علشان يخف الضغط على الزراعي، واضطرينا نخش في النوبارية بالطريقة دي علشان نخف الضغط عن الزراعي ويدي فرصة للدلتا تقدر تتحرك كويس".

واختتم: "بقول الكلام دا للمسئولين في المحافظات والمواطنين الكلام دا لازم تخلوا بالكم منه دا انتوا بتأذوا نفسكم دي تكاليف كبيرة جدا بتتاخد من مال محدش بيجيب حاجة من جيبه دي فلوس بتاعت مصر بتاعت الناس فبدل ما أصرف مليار ولا اتنينن ألاقي نفسي بصرف 5 و 6 ".