السيسي: ننفذ شبكة طرق تناسب أكتر من 100 مليون بعد أن كانت لـ 30 مليون

تحدث الرئيس عبد الفتاح السيسي، إن شبكة الطرق وقت تسمله أمور الدولة، كانت مخططة لـ 30 مليون تقريبا، وبالتالي لم تكن تلبي متطلبات التنمية ولا الحركة، مضيفا أن الدولة حاليا تعمل على توفير شبكة طرق تناسب 100 مليون.

وقال الرئيس في كلمته بافتتاح محور التعمير: "عاوز أقولكم على ملحوظة مهمة أوي الفريق كامل بيقولها مرور الكرام كدا، مثلا محور النوبارية المحور دا كان ممكن ميكلفناش الرقم اللي كامل بيقول عليه لو كانت الناس لم تتعدى على الجسر، المحور بقول كدا لينا كلنا لأن احنا مستغربين أوي من التكاليف اللي احنا بنعملها خليني أقولكم إن شبكة الطرق قبل ما أتولى المسؤولية كانت متخططة على 30 مليون تقريبا وعلشان كدا لم تكن تلبي لا تنمية ولا حركة".

ننفذ شبكة طرق تناسب أكتر من 100 مليون

وأكمل الرئيس: "فاللي احنا بنعمله بنحاول نعمل شبكة تناسب الـ 100 مليون ويمكن 10 سنين جايين كمان، هتوقف هنا عند حاجة وهتستغربوا أوي من الكلمة دي بس تخيلوا أنا بحمي جسر الترعة بالطريق تخيلوا ياسادة يامصريين إن احنا علشان نحمي الجسر والناس متبنيش عليه اللي هو دي أرض دولة معمولة علشان الجسر دا الجسر دا معمول علشان يحمي الترعة وميترميش صرف أو مخلفات أقوم أضطر علشان أحمي الجسر دا أقول اعملوا طريق اللي هو جسر أرض دولة".

دفعنا 700 مليون جنيه تعويض اجتماعي بمحور المحمودية

وتابع: "دا معناه إن احنا كدولة المواطنين عندنا من كتر ما الأمور فكت مننا خلال السنين اللي فات خلاص بقى أروح أبني عليه، في محور المحمودية لو المحور دا مكنش عليه أكتر من ألف أو ألفين وحدة على أرض مخالفة أرض دولة ودفعنا 700 مليون جنيه تعويض اجتماعي، يعني رغم إنه مخالف ودي مش أرضه قولنا منقدرش نسيب الناس كدا ونمشيها فاللواء هشام كان محافظ ساعتها قال إحنا محتاجين 700 مليون جنيه علشان أخلي المحور دا وأعمل طريق ييوصل من إسكندرية حتى أبو حمص حوالي 70 كيلو تقريبا".

وتابع: "توقفت هنا عاوز أقولكم لو مكناش الكلام دا موجود المخالفات دي كان زمان المحور دا اتعمل من سنتين فاتوا لكن لأن أنا بخش في إجراءات مع الناس وأدبرلهم الأموال المطلوبة بنزيل وبعدين نعمل المحور".

مش هنسمح بالتعدي على أرض الدولة تاني

وتابع: "فيه مناطق مقدرناش نعمل فيها كدا علشان لما لقينا الكثافة السكانية عالية أوي اضطرينا إن احنا نعمل كوبري علشان نحافظ على الترعة ونحافظ على الناس بقول كدا ليكم علشان الناس تبقى منتبهة إن احنا مفروض منعملش كدا تاني وإن الدولة تسمح بكدا تاني مفيش محافظ يسمح بالتعدي على جسر ترعة أو على حرم طريق".

وتابع: "حتى الطريق الزراعي اللي بنتكم عليه اتعمل سنة 59 لو مكنش تم التعدي على حرم الطريق كان ممكن أوي نعمل الطريق دا 5 حارات بربع التكلفة لكن احنا اضطرينا نكمل الصحراوي بالطريقة دي علشان يخف الضغط على الزراعي، واضطرينا نخش في النوبارية بالطريقة دي علشان نخف الضغط عن الزراعي ويدي فرصة للدلتا تقدر تتحرك كويس".

واختتم: "بقول الكلام دا للمسئولين في المحافظات والمواطنين الكلام دا لازم تخلوا بالكم منه دا انتوا بتأذوا نفسكم دي تكاليف كبيرة جدا بتتاخد من مال محدش بيجيب حاجة من جيبه دي فلوس بتاعت مصر بتاعت الناس فبدل ما أصرف مليار ولا اتنينن ألاقي نفسي بصرف 5 و 6 ".