السيسي: "يا جماعة يا بتوع ربنا بقالكوا 50 سنة بتدعوا وبتظلموا الدعاء"

حذر الرئيس عبدالفتاح السيسي، رئيس الجمهورية، اليوم الخميس، من خطورة النمو السكاني بشكل غير منظم.

وقال الرئيس السيسي خلال كلمته في افتتاح مدينة المنصور الجديدة: "لو فضل نمونا السكاني بالطريقة دي محدش هيقدر يحل المسألة دي خلاص ارضوا بقى متقولوش".

وأضاف الرئيس: "مفتكرش حد هيقدر يعمل أكتر من اللي احنا بنعمله والله.. ما حد هيقدر يعمل أكتر من اللي احنا بنعمله.. هقولكم على حاجة البلاد اللي زي حالاتنا دي عاوزة واحدة من 3 حاجات: إما صبر وعمل دا مسار نشوف نتائجة بعد سنين طويلة، مش أنا علشان سني لكن الشباب الصغير، ممكن اسمعوا كلامي بس، أو المسار الثاني إن أحنا نسيب البلد دي تضيع بقى".

وتابع: مفيش فايدة لأن هو في الأخر قولتلكم الحكاية دي مرة واتنين وعشرة هو حجم أموال طاقة دولة الطاقة دي، يا قد الدولة، يا أكبر منها، يا أقل منها.. وإن كانت أقل منها يبقى دائما الإحساس بالعوز والقلة.. وهو هيبقى جوانا دا لو كانت أقل لو قدها هيبقى الناس حاسة بشيء من الراحة لو أكثر.. هيبقى الإحساس بالرضا أكثر.. فاحنا بنقول يا ترى بالنمو السكاني بتاعنا دا على الموارد المتاحة عندنا الموارد المتاحة عندنا.. هل احنا في الأقل ولا في العام ولا في اللي فوق.. أنا بقولكم علشان ما أخبيش عليكم في الأقل حد يقولي في الأقل تقوم تعمل اللي بتعمله دا طالما بتقول أقل خلينا بقى نقعد في العشش.. لا يا جماعة مش كده".

وأكمل السيسي: "المسار الثالث هو إن ربنا جابلنا موارد مش في الحسبان يعني.. ومحدش بيخطط لبلده كدا.. يقولك مستنيين لما يجيلنا ربنا يوفقنا ويبعتلنا حاجة نورث يعني".

وقال الرئيس: "طيب ياجماعة يا بتوع ربنا أنتوا مش بتقعدوا تدعوا بقالكوا خمسين سنة.. بتدعوا تصدقوا بالله أنتوا بتظلموا الدعاء والله العظيم.. دعاء من غير عمل ربنا مبيعملش كدا.. تعمل وتقول يارب يقوم ربنا يوفقك.. لكن تدعي بس اقفل الكتاب طول السنة واقعد صلي وصوم وادعي وهات التسعين لا يمكن.. ربنا مقالش كدا".

وأضاف: "وعلشان كده بقول بتظلموا الدعاء بتظلموا العلاقة مع الله.. تقول أنا عندي هجيب وربنا يرزقني ويبقى عندك 5 أولاد أو 6.. تقول ربنا هيرزقني محدش هينام من غير عشاء صحيح.. لكن أنت طلعت إنسان مكتش بصير يعلى نفسك مكنتش حسيب على ظروفك.. وبالتالي على كل حال أنا أقصد أقول كان اللي احنا بنعمله دا هو أسمع كتير يقولك انتوا بتعملوا شبكة طرق ليه.. إيه الكباري دي ادونا نأكل ما هو أنا لو معملتش كدا هظلم الجيل دا والقادم والله.. لو مكانتش البلد يتعاد الخطة الاستراتيجية بتاعتها اللي اتعملت قبل ما أنا أجي واللي قبل مني ما ييجي لو متعملش يبقى احنا بنضيع البلد دي وبنضيع الناس.. طب احنا في خير ونعمة أيوه والله والعظيم احنا في خير ونعمة".