زاهي حواس يهاجم الأذان في مكبرات الصوت: إحنا دولة سياحية ولازم نحافظ على راحة السائح

قال عالم الآثار المصرية الدكتور زاهى حواس، وزير الآثار الأسبق، إن هناك بعض السلوكيات التي يفعلها المواطنين يجب عليهم تغيرها، لعدم مضايقة السائح عندما يأتي إلى بلادنا.

وتابع «حواس» خلال حواره في برنامج «نظرة»، الذي يعرض عبر قناة «صدى البلد»: «لازم نعمل مادة لطلبة المدارس عن السياحة، عشان يعرفوا يتعاملوا مع السائح، مش ممكن واحدة تبقى ماشية في الشارع بالغردقة وحد يقرصها، أو واحد بتاع بزار يقولك اتفضل ويشدك غصب عنك، أو واحد بتاع تاكسي تمنه 30 جنيه يقولك 50 دولار، ده بيحصل، وده عيب».

وأوضح: «الشرطة مش هتقدر تعمل حاجة مع هذه السلوكيات، الموضوع موضوع ثقافة، لازم الشعب يعرف إن كل واحد فيه هو وزير السياحة».

وتابع: «عاجبني إبراهيم عيسى لما اتكلم على موضوع الأذان، ما يتعمل جوه المسجد، وليه 70 أذان؟! أنا مرة نمت في مينا هاوس عندي محاضرة تاني يوم قمت على صوت الأذان بيقوم السياح اللي قاعدين، مفيش في الدين يقول إن يعمل الأصوات دي كلها، إحنا دولة سياحية ولازم نحافظ على راحة السائح، في حاجات لازم نبطلها عشان نجيب السائح».

وأكمل: «ليه الأذان اللي بره الجامع؟! اعمل الأذان اللي جوه، وأي حد متدين ميقولش أزعج الناس، ده إزعاج للناس، أنا عارف ميعاد الصلاة أروح أصلي في الجامع، ده شكوى بيشتكي منها السياح، ومش موجود في أي حتة في الدنيا غير عندنا».