خالد الجندي: أوعى تتخيل إن اللي بيرزقك هو الجنيه.. وطعام الواحد يكفي الاثنين

أكد الشيخ خالد الجندي الداعية الإسلامي، أن المواطنين يجب عليهم عدم الاعتقاد بأن رزقهم مرتبط بالأموال التي يتحصلوا عليها قائلا:  "اوعى تربط اللى في جيبك بأسعار السوق، أوعى تتخيل إن اللي بيرزقك هو الجنيه اللي في جيبك".

الله هو الرزاق

وأضاف الجندي خلال حلقة برنامج "لعلهم يفقهون"، المذاع على فضائية “دي إم سي”: "اوعى تتخيل أننا نرزق عن طريق وزير أو أمير أو سلطان، على الإطلاق، ولكن الله هو الرزاق ذو القوة المتين".

وواصل حديثه بالقول: "الرزق لا يحمي إلا بالقوة ولا يأتى للعبد محميا إلا بالقوة، علشان كده أقول نربط العملة لا بالين ولا بالدولار ولا بالليرة ولا بالين ولكن نربطها بتعلقك بالله".

واستطرد: "لو ربطنا العملة بتعلقنا بالله سعر العملة هيختلف بعامل مكاتب الصرافة متعرفهوش، فيه عملة مكاتب الصرافة متعرفهاش والبنوك مسمعتش عنها ولا يتم صكها في مجامع صك العملة، ومنعرفش نكتبها بالشيك وليست قابلة للتداول، وقل من يتعامل بها والكثيرون أغفلوها من حساباتهم أثناء مراقبتهم لسعر الدولار وأخبار سعر الجنيه الذهب، هي عملة البركة وهو اسم عزيز علينا جدا".

طعام الواحد يكفي الاثنين

وأكمل خالد الجندي حديثه بالقول: "احنا مش بننصب علي الناس بإسم البركة، ومش بنلم فلوس من حد، والنبي صلى الله عليه وسلم قلنا معادلة حسابية غريبة ولو كان الحديث ده النهاردة كانوا طلعوا علي السوشيال ميديا وهاجموه، قالنا النبي طعام الواحد يكفى الاثنين وطعام الاثنين يكفي الثلاثة وطعام الثلاثة يكفي الأربعة، وهذا كلام سيدنا رسول الله أي بعامل البركة هنلاقى الأكل يكفي والفلوس مكفية وربنا سترها ازاي دي مش شغلتنا".

وأردف: "علي فكرة 90% من الشعب تقريبا عايش بعامل البركة مش بحقيقة المال، ورئيس الدولة نفسه بيقولك صراحة أن لا يمكن لواحد يعيش في حالة مستقرة الا لو دخله 10 آلاف جنيه شهريا واحنا دخلنا أقل من ذلك إذن فهو عامل البركة".