السيسي: مفيش وقت نضيعه.. والرمال السوداء محتاج متابعة بدقة شديدة

قال الرئيس عبد الفتاح السيسي، رئيس الجمهورية: "الدولة ليس أمامها وقت لإضاعته.. نشجع العمل في مشروع الرمال السوداء.. علشان مفيش وقت أو فرصة نضيعها.. ومش ينفع نقول ماشي بقى إن شاء الله نبقى نفكر.. مفيش نفكر.. الحمد لله رب العالمين.. مش أول مرة اسمع الموضوع ده.. ده موضوع متابعة بدقة شديدة.. دي فلوس بنحطها ونأمل أنها تجيب لنا حاجة.. وبنعمل ده جنب ده يقوم البلد تطلع لقدام".

مشروع الرمال السوداء

أضاف الرئيس السيسي خلال كلمته في افتتاح مصنع الرمال السوداء: "أرجو أن رسالتي تصل للقطاع الخاص.. خشوا لوحدكم هنساعد معاكم.. ماشي.. بشراكة ندخل معاكم.. بحيث نقدر نعمل أكثر من مجمع للرمال السوداء".

وتابع رئيس الجمهورية: "مشروع الرمال السوداء، ننتظره من فترة طويلة.. انتظرنا المشروع ده فترة كبيرة اوي.. خلال أكثر من 3 سنوات.. ووصول المعدات خلال الفترة الماضية".

افتتاح مصنع الرمال السوداء

أضاف الرئيس السيسي، خلال كلمته في افتتاح مصنع الرمال السوداء: "بقول الكلام ده للقطاع الخاص والشركات اللي اشتغلت معانا في هذا المجال زي حسن علام وغيره.. أنت عرفت المسار.. ده مسار خد وقت طويل فيه.. المكونات والطرح والكلام اللي بيتعمل علشان وصول المعدات.. ثم 60 % منتجات تتعمل في مصر والباقي يجي من الخارج".

وأوضح رئيس الجمهورية: "لما كنا بنعمل المشروع بتاع الرمال السوداء.. ده سألت سؤال حجم الاحتياطات اللي موجودة هنا تكفي قد ايه.. وحجم الطلب العالمي عليه قد ايه.. هل فيه فرصة لمشروع و2 و3؟.. الطلب هو اللي بيحدد.. وبقول وبسمع للقطاع الخاص.. من أول المشروع ده.. متاح للقطاع الخاص الدخول فيه.. اللي عايز يتفضل.. وده بقوله في كل مشروع بيتم افتتاحه.. حد يقولي مش قولت له من الأول.. الفرصة دي كانت موجودة على مدار 40 و50 سنة".

مصنع الرمال السوداء

قال الرئيس السيسي: "عايزين نوضح للناس في مصر نعرف الحكاية دي.. بدأت امتي كتاريخ.. لفهم واكتشاف الموضوع ده في مصر.. يعني عاوز أقول كان من 80 و90 سنة.. وعاوز أقول لما اتكلمنا في الموضوع ده من 5 سنوات.. محدش كتير شجعنا كفكرة".

أوضح الرئيس عبدالفتاح السيسي، خلال كلمته في افتتاح مجمع مصانع الرمال السوداء بكفر الشيخ: "دراسات الجدوي للمشروع خدت 3 سنين.. ومين هيدفع تمن حاجة زي كده.. بقول الكلام ده للمصريين.. بعد ما عملنا الفكرة دي وخدنا المسار ده .. اشرح للناس يا دكتور حامد.. اشرح للناس علشان يفهموا الموضوع ده اكثر.. يمكن الناس أول مرة تسمع حاجة عن الرمال السوداء".

فعاليات افتتاح مصنع الرمال السوداء

بدأت، اليوم الخميس، فعاليات افتتاح مصنع الرمال السوداء في محافظة كفر الشيخ، ضمن المشروعات القومية المختلفة التي تنفذها الدولة.

ووصل الرئيس عبدالفتاح السيسي، رئيس الجمهورية إلى مقر افتتاح مصنع الرمال السوداء، بمدينة البرلس بمحافظة كفر الشيخ.

وصرح السفير بسام راضي، المتحدث باسم رئاسة الجمهورية، إن مصنع الرمال السوداء بكفر الشيخ هو الأحدث من نوعه على مستوى العالم باستخدام تكنولوجيا التعدين المتطورة، ويعتبر إضافة جديدة لسلسلة المشروعات القومية الكبرى التي تهدف إلى تعظيم الاستفادة والاستغلال الأمثل لموارد مصر الطبيعية.

وتابع متحدث الرئاسة: وكذلك تحقيق القيمة المضافة للمعادن المستخلصة من الرمال السوداء، التي تستخدم في العديد من الصناعات الدقيقة، مما يفتح الآفاق لاستثمارات جديدة تدعم الاقتصاد الوطني وعملية التنمية الشاملة.