السيسي لطلبة كلية الشرطة: قدموا للمخالف القدوة وعلموه بالأداء الراقي

وجه الرئيس عبد الفتاح السيسي رسالة إلى خريجي كلية الشرطة، خلال حفل تخرج الدفعة الجديدة قائلاً: "مصر أمانة في رقبتنا كلنا أمانها وسلامها واستقرارها وتقدمها أمانة في رقبتنا كلنا أرجو إن دائما نبقى عارفين إن المسئولية الملقاة على عاتق وزارة الداخلية كبيرة أوي واحنا كلنا واحنا ماشيين في الشارع نقول فين الشرطة لو قابلتنا مشكلة وحتى لو الأسعار غليت، منتظر من الناس كلها ومصر كلها بتقدر هذا الدور طالما إن هذا الدور يبقى دائما بيحترم إنسانية الناس وبيحترم إنفاذ القانون ودي النقطة اللي بأكدها عليكم". 

وتابع الرئيس: " بأكد عليكم إن احنا دائما واحنا بنتعامل مع مواطنينا نبقى دايما منتبهين إن احنا أه موجودين في الشارع وبنتعامل، اللي ماشي مظبوط معندكش مشكلة معاه أما اللي بيمارس ممارسات خاطئة  "ترفق بيه علمه من خلال أداءك الراقي وأيضا من خلال القدوة والممارسة كلنا مش بس أبنائنا في وزارة الداخلية".

وأكمل: "شعاركم علم وأخلاق وواجب فتسلحوا بالعلم دائما واحرصوا على التطور". 

وأكد الرئيس السيسي في كلمته على أن كل قطاعات الدولة يتم تطويرها قائلاً: "اوعوا تتصوروا إن فيه قطاع من قطاعات الدولة مبنقومش بالعمل على تطويره بس احنا بنشتغل من غير ضوضاء منقولش احنا هنعمل هيكلة وإصلاح لكن بنقوم بالدور دا بشكل مستمر لأن التطوير عملة مستمرة "الدنيا بتتغير"، ودا بيتنفذ في كل قطاعات الدولة والدولة كلها بتتحرك في تطوير قدراتها ومهاراتها ولكن من غير ضوضاء". 

ووجه الرئيس عبد الفتاح السيسي، رسالة لأسر الشهداء، خلال حفل تخرج دفعة جديدة من طلبة كلية الشرطة قائلاً "كلامي ليهم كله احترام وكله محبة احترام للعطاء اللي اتقدم لأجل خاطر بلدنا وخاطر شعبنا وعاوز أقول لكل الأسر الموجودة واللي بسمعونا أوعوا تفتكروا إن الدماء اللي قدمت والأرواح اللي راحت عند ربها دي تمن بسيط أولا في رقبتنا احنا كمصريين كلنا وفي شعب مصر كله وأيضا عند الله سبحانه وتعالى وأنا الكلام دا كررته وقولته قبل كدا خلي بالكم أبنائكم أو أزواجكم اللي انتوا قدمتموهم كانوا سبب في اللي احنا موجودين فيه دلوقتي اللي انتوا شايفينه دا كان تمنه أرواح ودماء أبناء وبنات مصر".

وتابع الرئيس خلال كلمته: "أه تمن غالي أوي لكن إن يكون التمن دا حماية وتأمين واستقرار أكتر من 100 مليون ومش بس أمانهم وسلامهم حتى في مستقبلهم البلد لو كانت راحت مكنش هيبقى فيه مستقبل لحد خالص، مش هقول متزعلوش لا بس احنا معالكم وقبل ما نكون معاكم ربنا موجود معاكم وخلي بالكم الشهيد عند ربنا حاجة جميلة أوي، ولازم كلنا كمصريين مننساش لما الأمور اتحسنت وبفضل الله كل التهديدات والإرهاب بفضل الله وبفضل أبناء مصر من الشرطة ومن الجيش الحمد لله احنا في مكان كويس أوي".